Мирас Төлебаев: Қазақстандағы ішкі туризм көлемі 84,4%-ға өсті
Соңғы жеті жылда Қазақстанның ішкі туризмі келушілер саны бойынша 84,4%-ға өсті. Елімізде жаңа әуежайлар салынып, теміржол вокзалдары жаңартылды. Заманауи қонақүйлер ашылып, нарыққа халықаралық желілер мен отандық жаңа брендтер келіп жатыр. Тұрғындар ел ішінде демалуды жиі таңдай бастаған.
Ал туристік сала экономиканың маңызды бөлігіне айналып келеді. Осы жылдар ішінде не өзгерді және әлі де қандай түйткілдерді шешу қажет? Бұл туралы бізге Туризм және спорт вице-министрі Мирас Төлебаев айтып берді.
– Мирас Қалиұлы, жеті жыл ішінде елімізде туристік сала қаншалықты өзгерді?
– Меніңше, бұл өзгерістер Қазақстан бойынша саяхаттайтын кез келген адамға байқалады. Бүгінде демалуға арналған мүмкіндіктер әлдеқайда көп: жаңа қонақүйлер, демалыс базалары, қызықты маршруттар пайда болып жатыр, сервис дамып келеді. Бұл сандармен де расталады. 2019 жылы орындарды орналастыру қызметтерін 4,7 млн ішкі турист пайдаланған. 2025 жылдың қорытындысы бойынша бұл көрсеткіш 8,66 млн адамға жетті. Олай болса, жеті жыл ішінде өсім 84,4%-ды құрады. Жалпы, өткен жылы қонақүйлер, демалыс базалары және басқа да орналастыру объектілері шетелдік қонақтарды қосқанда 10,09 млн келушіге қызмет көрсетті. Оң динамика биыл да сақталып отыр. 2026 жылдың бірінші жартыжылдығында орналастыру орындарының қызметін 4,77 млн адам пайдаланса, оның 4,13 млн-ы – ішкі туристер. Алайда біз үшін тек туристік ағын көрсеткіштері маңызды емес. Жеті жыл ішінде туристік саладан түсетін салық түсімдері 160-тан 630 млрд теңгеге дейін, ал бұл салада жұмыспен қамтылғандар саны 460-тан 650 мың адамға дейін артты. Яғни, бүгінгі туризм – бұл тек демалыс пен саяхат қана емес. Бұл – жаңа жұмыс орындары, бизнесті дамыту және өңірлерге арналған қосымша кіріс көзі.
